jab ruh bechayn ho tou samajh layna chahiye k dil ki maramat ka waqt aa gaya hai. par yeh koi manzil nahi balke aik taweel safar hai. aik jid o jehed hai. aur iss safar main sab se pehle insaan khudh se hi ulajhta hai. thak jaane par apne aas paas waloon se ulajh baithta hai. aur jab nidhaal ho jata hai tou dil khudh iss baat ki gawahi dayta hai k aye ibn e adam, yeh tere bas ka kaam nahi. tujhe aise sahare ki zaroorat hai jo hamaisha se raha hai aur tere sambhal kar dobara girne par bhi qaim rahe ga. tab ja kar insaan ko samjh aati hai k woh khudh kuch bhi nahi. baqi duniya ka har rishta rehmat hone k saath saath aik imtehaan bhi hai aur humare imtehaan ka nateeja humain agle jahaan main hi mile ga. sirf aik rishta aisa hai—ruh ka apne Rabb se—jo k dono jahanoon ki qamyaabi hasil kar sakta hai. Uss Zaat ki mohabbat belaus aur begharz hai. Usse jis haal main milo, qabool hai. Usse jab bhi pukaro, Woh hazir hai. Woh na tou naraaz hota hai, na ruswa karta hai. Uski dehleez pe sirf umeed hai. Uski farma bardaari uss raaste ki roshni hai jo k seedha jannat ko jata hai.